PALUI tamasuk bauntung baisi anak, matan lagi halus inya sudah hakun balajar bapuasa kaya urang tuha. Takananya puasa satangah hari, tapi bila kuat inya saharian jua kaya kuitannya.
“Sabujurnya aku kasian jua lawan inya,” ujar bini Palui maitihi ka nang anak.
“Kasian kanapa umanya?”
“Sabujurnya inya balum wajib bapuasa, kada usah kita mamaksa inya puasa saharian.”
“Tapi kita wajib jua malajari matan lagi halus. Kaena mun kita biarakan satayuhnya kada puasa, sampai katuha kada pamuasa,” ujar Palui.
“Kaya abahnya bahari,” ujar nang bini mahuhulut.
Pas parak kadap hari, anak palui kukuciak mamadahi kuitannya. “Ma, ma sudah jamnya babuka kalu, kanapa pian kada manyiapakan makanan?” ujar nang anak manunjuk ka jam dinding.
Palui wan bininya takajutan badadua imbah maitihi ka jam. “Bujur umanya ai, ini sudah liwat jamnya babuka, lajui siapakan pabukaan,” ujar Palui.
“Kabiasaan mun babuka ada haja tadangar urang bang atawa bunyi sarina, tapi kanapa hari ni kadada,” ujar bini Palui.
Nang anak limbah malihat pabukaan sudah siap langsung makan bahimatan.
“Urang babacaan nang ai mun babuka tu,” ujar Palui managur.
“Ulun lapar banar bah ai. Kanapa bubuhan pian balum makanan?” ujar nang anak manakuni kuitannya.
“Abah manunggui urang bang dahulu nak ai,” ujar Palui rasa kada yakin. Kada singhaja Palui taitihi jam nang di tangannya.
“Kanapa jam ku kada sama lawan nang di dinding?” ujar Palui gagarunum.
“Jam pian sudah babuka lah?” ujar nang bini manakuni.
“Amun jam di tanganku ni satangah jam lagi, aku curiga lawan utuh kita ni,” ujar Palui manyirit ka anaknya. “Ikam apa-i nang jam dinding tu tadi?” ujar Palui manakuni anaknya.
“Ulun baiki bah ai. Tadi kada bagarak, lalu ulun garakakan,” ujar nang anak kada tatahu muha.
“Kada lain umanya ai, pasti dilajuinya,” ujar Palui curiga.
“Pantas haja inya basamangat mamadahi babuka, sakalinya inya maakal maubah ka jam.
“Kada lain abahnya bahari,” ujar nang bini lihum.
“Amun nang buruknya abah tarus, nang baiknya pasti turunan inya,” ujar Palui. (bpt/fai)
koleksi kisah palui bisa juga dibaca disini
Tidak ada komentar:
Posting Komentar